Л.ОЮУН-ЭРДЭНЭ: ХЯМД ОРОН СУУЦ БАРИХАД ТӨР, ХУВИЙН ХЭВШЛИЙН ТҮНШЛЭЛ ЧУХАЛ
Ерөнхий сайд Л.Оюун-Эрдэнэ "Алсын хараа 2050" урт хугацааны бодлогын баримт бичигт тусгагдсан залуучуудаа орон сууцаар хангах зорилтыг хэрэгжүүлэхдээ Засгийн Газраас барилгын салбарынхантайгаа хамтарч ажиллах талаар онцоллоо.
 
Мөн Монгол Улсын Засгийн газраас хэрэгжүүлж буй 150 мянган айлын орон сууц хөтөлбөрийн хүрээнд дэд бүтэц, гэр хроооллын дахин төлөвлөлт, дагуул хот барихтай холбоотой асуудлыг БХБЯ-наас шийдвэрлэж буйг цохон тэмдэглэлээ.  "Энэ ажил нь нэг яам биш бүх яамд, нийслэлийн хамтын ажил. Гэхдээ төр, хувийн хэвшлийн түншлэлээр ажил хэрэг болох боломжтой" хэмээн үзэж байгаагаа илэрхийлсэн юм.
 
Залуу гэр бүл орон сууц авахад 30 хувийн урьдчилгаа хүнд асуудал болдог. Гэр хорооллын 200 мянган өрх шууд орон сууц худалдан авахад амаргүй байгааг тэмдэглээд, энэ хүрээнд есөн зорилго, 47 зорилт бүхий урт хугацааны бодлого хэрэгжүүлэх юм байна. Тухайлбал, уг зорилтод Улаанбаатар хотоос 25 километрийн тойрогт Багануур, Багахангай, Тэрэлж, Налайх, Аэросити, Био, Туул, Шувуу тосгон, Аргалант, Эмээлт зэрэг дагуул хот бий болгох дэд бүтэц шийдэхийг зорьж буйг тодотгов.
 
Хотуудыг аялал жуулчлал, хөдөө аж ахуй, туслах аж ахуй, худалдааны гэсэн чиглэлээр төрөлжүүлэх бодлого баримтална гэлээ. Цаашлаад, хөдөө орон нутагт төвлөрөл бий болгохын тулд хувийн хэвшилтэй хамтарч тухайн газарт эдийн засгийн эргэлт бий болгох шаардлагатайг онцлов. 
 
Барилгын компанийн төлөөлөлтэй уулзахад, нийслэл газраа үнэтэй өгдөг, мөн эрчим хүчний эх үүсвэр авахад асар их авлига бий болдог, түүхий эд үнэтэй байдаг зэргээс хамаарч орон сууцаа үнэтэй зарахаас өөр аргагүй хэмээн хэлдэг байна. Тиймээс төрөөс хариуцах асуудлыг шийдвэрлэж нэгдсэн зургийн стандартаар орон сууц хямдхан барих боломжтой гэж үзэж буйгаа Ерөнхий сайд Л.Оюун-Эрдэнэ тэмдэглэлээ. Тэрбээр, "Нэгдсэн зургаар орон сууц барьсны дараа санхүүжилтийн загварыг шийдэх хэрэгтэй. Хэрэв агаарын бохирдлын нэгдүгээр бүсэд орон сууц авбал, 30 хувийн урьдчилгаагүй зэргээр дэмжих нь зүй. Үүнийг агаарын бохирдлын эсрэг сангаас шийдвэрлэнэ. Мөн тухайн гэр бүлийн гурван үе хамт амьдарч байгаа бол урьдчилгаа төлбөр авахгүй шууд дэмжинэ. Учир нь, тухайн гэр бүл гурав биш нэг автомашин хэрэглэх учрааас түгжрэлийн эсрэг бодлогыг дэмжиж байгаа юм. Зургаан сарын хугацаатай цэргийн алба хааж эх оронч иргэнийг дэмжих хөтөлбөрт оролцсон зэрэг шалгуур тавих боломжтой" хэмээв. 
Орон сууц барих газар, дэд бүтцийг төр үнэгүй өгч, эхний ээлжинд "Залуус 1, 2, 3" хорооллыг туршилтаар барихаар бэлтгэж байгааг дурдаад, энэ хүрээнд Яармагийн цаана болон Баянзүрх дүүрэгт дэд бүтэц шууд татах боломжтой нөөц газар байгааг тэмдэглэв. Мөн Хөшигийн хөндий рүү төлөвлөлтөө хөгжүүлж чадвал тэнд бизнесийн урсгал байгааг онцоллоо. 
 
"Залуус 1, 2" хорооллыг Улаанбаатар хотод, "Залуус 3" хорооллыг орон нутагт туршилтаар барихаар зорьж байгааг Ерөнхий сайд Л.Оюун-Эрдэнэ тэмдэглээд, төр өөрийн хариуцах асуудлаа шийдээд нэг зургаар хямд орон сууц барих боломжийг дахин онцлов. 
  Эх сурвалж: www.mcud.qov.mn

 

Alternative text - include a link to the PDF!

НИЙТЭЛСЭН: 2021-02-02 өдөр 10:50:1 цаг